Plantun de Prouvènço

Pèr coumpara dos planto d'encò nostre

Aira elegantissima & Picea abies

Aira elegantissima

Poaceae Graminaceae

Noms en français : Canche élégante, Canche capillaire.

Descripcioun :
Aquesto coutelino es uno planto primo que fai uno paumo di proun laco. Trachis en mato dins li relarg séusous. Li darrié pecou di ramo podon faire fin qu'à 5 cop la taio de l'espigueto. Tambèn aquésti pecou soun mai espés au bout. Li lemma fan mens de 1,5 mm e i'a uno o dos arèsto que sorton dis espigueto.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Aira
Famiho : Poaceae
Famiho classico : Graminaceae

Ordre : Poales

Coulour de la flour :
Petalo : ges
Ø (o loungour) flour : 1,5 à 2,5 mm
Flourido : Printèms - Estiéu

Sòu : Si (Ca)
Autour basso e auto : 0 à 800 m
Aparado : Noun
Mai à juliet

Liò : Tepiero seco - Champino
Estànci : Termoumediterran à Coulinen
Couroulougi : Eurimediterrano
Ref. sc. : Aira elegantissima Schur, 1853

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.